Qyteti i Syriganës — Një qytet antik mbi kodrat e Drenicës. Në fshatin Syriganë të komunës së Skenderajt ndodhet një nga sitet më të lashta arkeologjike në Kosovë, Qyteti i Syriganës. Ky lokalitet i rrallë historik daton nga periudha e Neolitit të Hershëm (6000-2600 p.e.s) dhe përfaqëson një dëshmi të pasur të jetës parahistorike në rajon. T ngritur mbi një kreshtë shkëmbore cilindrike, vendbanimi antik përfitonte nga terreni mbrojtës natyror, klima e butë, tokat pjellore dhe burimet e shumta ujore të zonës. Nga mijëvjeçari i IV para erës sonë, këtu u zhvillua qyteti i njohur si Petropolis — Qyteti i Gurit (më vonë Suka e Gurit, sot Syriganë), një qendër e organizuar e banimit me sistem shoqëror të ngjashëm me qytetet e hershme mesdhetare. Gjurmët e Epokës së Bronzit të Vonë (1450-1100 p.e.s), Antikitetit të Vonë dhe Mesjetës së Hershme (shek. IV–VII e.s.) janë ende të dukshme në këtë sit, ku ruhen edhe fragmente të mureve të vjetra mbrojtëse. Që nga viti 2016, Qyteti i Syriganës është nën mbrojtje institucionale si monument i trashëgimisë kulturore dhe vazhdon të tërheqë interesin e studiuesve dhe vizitorëve që duan të prekin nga afër rrënjët më të lashta të civilizimit në Drenicë.